بىز مۇۋەپپەقىيەتتىن بۇرۇن نېمىنى قىلالايمىز

ئاپتۇر : مۇتەللىپ ئەنۋەر ئۇيغۇرتېكىن    مەنبە : ئۇيغۇرتېكىن بلوگى
ھەممە ئادەم مۇۋەپپەقىيەت قازىنىشىنى ئويلايدۇ . ھېچكىمنىڭ قەدەمدە بىر مەغلۇبىيەتكە ئۇچراپ يامان كۈنگە قالغۇسى يوق ئەلۋەتتە . مۇۋەپپەقىيەت ھەممىمىز ئىنتىلىدىغان بۈيۈك نىشان . ئەمما ھەممە ئادەمنىڭ مۇۋاپىقىيەت قازىنىپ كېتىشى ناتايىن ، ئەمما ھەممە ئادەم جەزمەن ھەرخىل تۇيغۇغا ئىگە بولىدۇ . بەزىلىرى نېمە ئۈچۈن مەغلۇب بولغانلىقى ئۈستىدە كاللا قاتۇرسا ، يەنە بەزىلىرى بۇ قېتىمقى ئاچچىق تەجرىبە ساۋاقنى يەكۈنلىمەكچى بولىدۇ . يەنە بەزىلەر كىملەردىندۇر ۋە جەمئىيەتتىنمۇ رەنجىپ ئۈلگۈرىدۇ . مېنىڭچە باشقىلاردىن ۋە جەمئىيەتتىن رەنجىگەننىڭ ھېچقانداق ئەھمىيىتى يوق . رەنجىشكە توغرا كەلسە پەقەت ۋە پەقەت ئۆزىمىزدىن رەنجىسەك بولىدۇ . گەپنى مۇشۇ ماقالىنىڭ تىمىسىغا قاراتقاندا ، مېنىڭ بۇيەردە مۇلاھىزە قىلماقچى بولغان ئاساسلىق مەسىلەم – مۇۋاپىقىيەتتىىن بۇرۇنقى ئىشتۇر .
بۇ يولغا كىرگەن ئادەم ھامان ئىككى خىل نەتىجە بىلەن قايتىدۇ . بۇ يەردە بۇ ئىككى خېل نەتىجىدىن باشقا ھېچقانداق نەتىجە بولمايدۇ . يەنى ، بىرسى ، نىشانغا يېتىش ؛ يەنە بىرسى ، نىشانغا يېتەلمەسلىك . مانا مۇۋەپپەقىيەت بىلەن مەغلۇبىيەت مانا مۇشۇ ئىككى نەتىجىگە قاراپلا ئايرىلىدۇ . سىز مەيلى ئاخىرقى نۇقتىغا قانچىلىك يېقىنلىشىڭ ، سىز نىشانغا يېتەلمىگەن بولسىڭىز ، ئۆزىڭىزنى ئالداپ يۈرۈشنىڭ ھېچقانداق زۈرۈيىتى يوق . ئۆزىڭىزنى ئېتىراپ قىلىشنى بىلسىڭىز ، ئەتراپىڭىزدىكى مۇھىت كەڭرى بىلىنىدۇ ، ھەممە نەرسە ئۆز قىممىتى بىلەن سىزگە مۇئامىلە قىلىدۇ ، ئەگەر سىز ئۆزىڭىزنى ئالداپ يۈرسىڭىز ، ھەممە نەرسىنىڭ سىزگە ھېچقانداق رولى بولماسلىقى سىزنىڭ خىيالىڭىزنى بىر مۇقەررەرلىك ، ئەلۋەتتە .
ئۇنداقتا ، بىز زادى مۇۋەپپەقىيەت بۇرۇن نېمىنى قىلالايمىز ؟ زادى نېمىنى قىلىشقا بىزنىڭ قۇربىتى يېتىدۇ ؟ بىز مۇۋەپپەقىيەتتىن بۇرۇن نېمىنى قىلىشقا سالاھىيەتلىك ؟ مانا بۇ مەسىلە ھەممىمىزگە ئىچكىي ئېنېرگىيە ئاتا قىلىدىغان ، ھەممىمىز زۆرۈر دەپ قارايدىغان تەخىرسىز مەسىلىدۇر . نۇرغۇن كىشىلىرىمىز ئويلىشىشى مۇمكىن ، مۇۋەپپەقىيەتتىن بۇرۇن ئىجتىمائىي مۇناسىۋەتنى ياخشىلاش ، پايدىلىق شارائىت ھازىرلاش ، ئىقتىسادنىڭ كۈچىنى نامايان قىلىش … قاتارلىق بىر قاتار ئىلمىي بولمىغان كۆز قاراشلارنى كۆز ئالدىغان كەلتۈرۈشى مۇمكىن . بۇنى ھەممە ئادەم قىلىپ كېتەلمەيدۇ . ئۇنداقتا مۇۋەپپەقىيەتنىڭ ئالدىدا قولىدا تىيىننىڭ سۇنۇقى بولمىغان بىر ئادەمدىن تارتىپ ھەتتا مىليۇنىرغىچە ماس كېلىدىغان قىلىش پۇرسىتى تولۇق پىشىپ يېتىلگەن نەرسە زادى نېمە ؟ ئۇ بولسىمۇ جاپاغا چىداپ مەشىق قىلىش . بۇ ھەرگىزمۇ مەن بۇ يەردە يېزىپ ئولتۇرغان بىر جۈملە ئاددىيلا سۆز ئەمەس . پەقەت مۇشۇلا بىزگە ھەقىقىي ئۈنۈم بېرىدۇ . بىز قانچىلىك بەدەل تۆلىسەك ، ئۇ بىزنى قۇرۇق قول قايتۇرمايدۇ . بۇ بىز بىردىنبىر قىلىش ھوقۇقىغا ئىرىشكەن شەرەپلىك ئىش . ئەزەلدىن دۇنيانى ئۆزگەرتىپ كەلگەن مەشھۇر شەخسىلەرنىڭ ھەممىسى كۆپىنچە ئەھۋالدا مۇشۇ قائىدىگە بويسۇنۇپ كەلگەن . توغرا بىز باشقىلارنى بويسۇندۇرالمايمىز ، باشقىلارنى بويسۇندۇرىمىز دېگىنىمىز ئۇخلاپ چۈشىمىز ، بىر ئادەم بىر ئادەمگە ئەبەدىي بويسۇنمايدۇ ، ئۇ گەرچە قۇل بولغان تەقدىردىمۇ شۇنداق . ئەمما بويسۇندۇرۇش تامامەن مۇمكىن بولغان ئۆزىمىزنى بويسۇندۇرساق ، مۇۋەپپەقىيەتتىن بۇرۇن پەقەت تىرىشىپ مەشىق قىلساق ، بىزنىڭ مەلۇم جەھەتتىكى قابىلىيىتىمىز مەلۇم سەۋىيىگە يەتسە ، ئۇ ھالدا بىزنىڭ شۇ ساھەدە بىر ئىشنى باشقا ئېلىپ چىقىشىمىز پۈتتى دېگەن گەپ . تەر ئاققۇزماي نەتىجە ئېرىشىش ئەخمەقلەرنىڭ ئىشى بولسا كېرەك .
مۇۋەپپەقىيەت بىر مۇشكۈل جەريان ، بۇ جەرياندا نەتىجىگە ئالدىراپ مۇھىم ھالقىلارغا سەل قاراشقا بولمايدۇ ، ئامال بار ئۆزىمىزنى تەمكىن تۇتۇپ ، جاپاغا چىداپ مەشىق قىلىشىمىز كېرەك . ئەگەر بىز جاپاغا چىداپ مەشىق قىلىشنى بىلمىسەك ياكى بەرداشلىق بېرەلمىسەك مۇۋەپپەقىيەت چۈشىنى كۆرمىسەكمۇ بولىدۇ . ئۆزىمىزدە بار بولغان كۈچنى ھېس قىلالمىساق ، ئەڭ ئاددىي نەرسىلەردىمۇ باشقىلارنىڭ ئاغزىغا قارىساق ، بىزدە نەدىمۇ ئىجادىي تەپەككۇر بولسۇن ؟ بۇنداق ئادەمدىن يەنە كەلگۈسىدە قانداق چوڭ ئۈمىدلەرنى كۈتكىلى بولسۇن ؟ شۇڭا بىز ئۆزىمىزنى قەدىرلەپ ، ئۆزىمىزدىكى يۇشۇرۇن كۈچنى قازايلى ، ئۆزىمىز جەزمەن قىلالايدىغان مۇۋەپپەقىيەتتىن بۇرۇنقى جاپالىق مەشىقنى باشلايلى . بىز ھامان كۆڭۈلدىكىدەك نەتىجىگە ئېرىشىمىز . ئاندىن ئۆزىمىزنى ۋە ئەتراپىمىزدىكى مۇھىتنى ئۆزگەرتەلەيمىز . مانا مۇشۇنداق ئۆزگىرىش ياسىيالايدىغان ئادەملا ھامان غالىبىيەت سەھنىدىن ئورۇن ئالىدۇ .
ئۇلىنىش مەنزىلى :  http://uyghurtekin.blogbus.com/logs/65476796.html

مۇناسىۋەتلىك تېمىلار: