ئامېرىكا چېكاگو ئۇنىۋېرسىتېتى مېدىتسىنا مەركىزىدىكى تەتقىقاتچى خادىملارنىڭ يېقىندا كۆرسىتىشىچە، مىس، سىنك ۋە تۆمۈردىن ئىبارەت ئۈچ خىل ماددا چوڭ مېڭىنىڭ يېتىلىشىدە مۇھىم بولسىمۇ، ئەمما ياشانغانلارنىڭ يېمەك – ئىچمىكى تەركىبىدىكى مىس مىقدارى زىيادە يۇقىرى بولسا، ئۇلارنىڭ چوڭ مېڭىسىنىڭ قېرىش سۈرئىتى تېخىمۇ تېزلىشىپ كېتىدىكەن، ھەتتا ياشانغانلاردىكى دېۋەڭلىك كېسىلىنى كەلتۈرۈپ چىقىرىشى مۇمكىن ئىكەن.
تەتقىقاتچى خادىملار يېشى 65 ياشتىن يۇقىرى 3700 ياشانغانلارنى ئالتە يىل ئىز قوغلاپ تەكشۈرگەن. بۇنىڭ ئىچىدە 600 كىشىنىڭ ھەر كۈنى قوبۇل قىلغان مىس مىقدارى ئاز دېگەندىمۇ 1.6 مىللىگرام، قوبۇل قىلغان تويۇنغان ياغ مىقدارىمۇ يۇقىرىراق بولغان. تەتقىقاتتىن بايقىلىشىچە، بۇلارنىڭ ئىچىدە، نۇرغۇنلىرىنىڭ چوڭ مېڭىسىنىڭ قېرىشى ئادەتتىكىگە قارىغاندا 19 ياش چوڭ بولغان.
تەتقىقاتچى خادىملارنىڭ ئېيتىشىچە، ساغلام كىشىلەرنىڭ ھەر كۈنى قوبۇل قىلىدىغان مىس مىقدارى 0.9 مىللىگىرام بولۇشى كېرەك ئىكەن. قان تەركىبىدىكى مىس مىقدارى زىيادە كۆپ بولۇپ كەتسە، بەدەننىڭ مەلۇم زىيانلىق ئاقسىلنى چىقىرىۋېتىش ئىقتىدارى تۆۋەنلەپ كېتىدىكەن. بۇنداق ئاقسىل ياشانغانلار چوڭ مېڭىسىنىڭ زەئىپلىشىشىنى كەلتۈرۈپ چىقىرىدىغان ئامىللارنىڭ بىرى ئىكەن. شۇڭا، ئادەتتە، ياشانغانلاردىكى دېۋەڭلىك كېسىلىگە گىرىپتار بولغان ئاغرىقلارنىڭ قان تەركىبىدىكى مىس مىقدارى ساغلام كىشىلەرنىڭكىدىن يۇقىرى بولىدىكەن.
ھايۋانات جىگىرىنىڭ تەركىبىدە مىس مول بولىدۇ، قاتتىق پوستلۇق مېۋىلەر، بەرەنگى، شاكىلات ھەم بەزى مېۋىلەرنىڭ تەركىبىدىمۇ مىس مىقدارى يۇقىرىراق بولىدۇ. يەنە مىستىن ياسالغان تۇرۇبا ئارقىلىق يەتكۈزۈلگەن ئىچىملىك سۇ تەركىبىدىمۇ مىس مىقدارى يۇقىرى بولىدۇ. بۇ يەردە ئەسكەرتىپ ئۆتۈشكە تېگىشلىكى شۇكى، تەتقىقاتنى قوبۇل قىلغان ياشانغانلارنىڭ بەدىنىدىكى مىس تەركىبىنىڭ يۇقىرى بولۇشىدىكى ئاساسىي سەۋەب ئۇلارنىڭ دائىم كۆپ خىل ۋىتامىنلارنى قوبۇل قىلغانلىقىدىن بولغان ئىكەن.
گۈلگىنە مەسغۇت تەرجىمىسى
