نورمال ئادەمنىڭ قان بېسىمى روشەن ھالدا كۈندۈزى يۇقىرى ، كېچىسى تۆۋەن بولىدۇ . قان بېسىمى كەچتە ئۇخلىغان چاغدا ئەڭ تۆۋەن بولۇپ ، تاڭ سەھەردە تېز ئۆرلەيدۇ . بۇ خىل ھادىسە قان بېسىمنىڭ سەھەردە تېز ئۆرلىشى ، دەپ ئاتىلىدۇ .
قان بېسىمنىڭ تاڭ سەھەردە ئۆرلەپ كېتىشى يۈرەك ، مېڭە قان تومۇر كېسەللىرىنىڭ سەھەردە قوزغىلىش نىسبىتى ئەڭ يۇقىرى بولۇشتىكى ئاساسلىق ئامىل . ئەتىگەن سائەت 6:00 دىن 12:00 گىچە بولغان ئارىلىقتا بىر كۈندىكى باشقا ۋاقىتلارغا قارىغاندا ، يۈرەك كېسىلىنىڭ قوزغىلىش خەۋپى %40 ، يۈرەك سانجىقى بىلەن ئۆلۈش نىسبىتى %29 ، ھەر خىل سەكتە يۈز بېرىش خەتىرى %49 يۇقىرى بولىدۇ .
تەتقىقاتتا بايقىلىشچە ، قان ئازلىق ۋە قاناش خاراكتېرلىك مېڭە سەكتىسىنىڭ ئەتىگەندە قوزغىلىش نىسبىتى يۇقىرى بولۇش ئېھتىماللىقى قان بېسىمى يۇقىرىلار ۋە قان بېسىمى نورماللاردا ئوخشاش بولۇپ ، قان بېسىمىنىڭ ئەتىگەندە ئۆرلەپ كېتىشى بىلەن زىچ مۇناسىۋەتلىك ئىكەن . شۇڭا ، قان بېسىمى نورمال كىشلەرمۇ قان بېسىمىنىڭ سەھەردە ئۆرلەپ كېتىشىگە سەل قارىماسلىقى كېرەك .
‹‹ شىنجاڭ پەن–تېخنىكا گېزىتى›› دىن ئېلىندى
